麥克謙一年通讀

The Empty Tomb

¹Una autem sabbati, Maria Magdalene venit mane, cum adhuc tenebræ essent, ad monumentum: et vidit lapidem sublatum a monumento.

²Cucurrit ergo, et venit ad Simonem Petrum, et ad alium discipulum, quem amabat Jesus, et dicit illis: Tulerunt Dominum de monumento, et nescimus ubi posuerunt eum.

³Exiit ergo Petrus, et ille alius discipulus, et venerunt ad monumentum.

⁴Currebant autem duo simul, et ille alius discipulus præcucurrit citius Petro, et venit primus ad monumentum.

⁵Et cum se inclinasset, vidit posita linteamina: non tamen introivit.

⁶Venit ergo Simon Petrus sequens eum, et introivit in monumentum, et vidit linteamina posita,

⁷et sudarium, quod fuerat super caput ejus, non cum linteaminibus positum, sed separatim involutum in unum locum.

⁸Tunc ergo introivit et ille discipulus qui venerat primus ad monumentum: et vidit, et credidit:

⁹nondum enim sciebant Scripturam, quia oportebat eum a mortuis resurgere.

¹⁰Abierunt ergo iterum discipuli ad semetipsos.

Jesus Appears to Mary Magdalene

¹¹Maria autem stabat ad monumentum foris, plorans. Dum ergo fleret, inclinavit se, et prospexit in monumentum:

¹²et vidit duos angelos in albis sedentes, unum ad caput, et unum ad pedes, ubi positum fuerat corpus Jesu.

¹³Dicunt ei illi: Mulier, quid ploras? Dicit eis: Quia tulerunt Dominum meum: et nescio ubi posuerunt eum.

¹⁴Hæc cum dixisset, conversa est retrorsum, et vidit Jesum stantem: et non sciebat quia Jesus est.

¹⁵Dicit ei Jesus: Mulier, quid ploras? quem quæris? Illa existimans quia hortulanus esset, dicit ei: Domine, si tu sustulisti eum, dicito mihi ubi posuisti eum, et ego eum tollam.

¹⁶Dicit ei Jesus: Maria. Conversa illa, dicit ei: Rabboni (quod dicitur Magister).

¹⁷Dicit ei Jesus: Noli me tangere, nondum enim ascendi ad Patrem meum: vade autem ad fratres meos, et dic eis: Ascendo ad Patrem meum, et Patrem vestrum, Deum meum, et Deum vestrum.

¹⁸Venit Maria Magdalene annuntians discipulis: Quia vidi Dominum, et hæc dixit mihi.

Jesus Appears to the Disciples

¹⁹Cum ergo sero esset die illo, una sabbatorum, et fores essent clausæ, ubi erant discipuli congregati propter metum Judæorum: venit Jesus, et stetit in medio, et dixit eis: Pax vobis.

²⁰Et cum hoc dixisset, ostendit eis manus et latus. Gavisi sunt ergo discipuli, viso Domino.

²¹Dixit ergo eis iterum: Pax vobis. Sicut misit me Pater, et ego mitto vos.

²²Hæc cum dixisset, insufflavit, et dixit eis: Accipite Spiritum Sanctum:

²³quorum remiseritis peccata, remittuntur eis: et quorum retinueritis, retenta sunt.

The Doubt and Faith of Thomas

²⁴Thomas autem unus ex duodecim, qui dicitur Didymus, non erat cum eis quando venit Jesus.

²⁵Dixerunt ergo ei alii discipuli: Vidimus Dominum. Ille autem dixit eis: Nisi videro in manibus ejus fixuram clavorum, et mittam digitum meum in locum clavorum, et mittam manum meam in latus ejus, non credam.

²⁶Et post dies octo, iterum erant discipuli ejus intus, et Thomas cum eis. Venit Jesus januis clausis, et stetit in medio, et dixit: Pax vobis.

²⁷Deinde dicit Thomæ: Infer digitum tuum huc, et vide manus meas, et affer manum tuam, et mitte in latus meum: et noli esse incredulus, sed fidelis.

²⁸Respondit Thomas, et dixit ei: Dominus meus et Deus meus.

²⁹Dixit ei Jesus: Quia vidisti me, Thoma, credidisti: beati qui non viderunt, et crediderunt.

³⁰Multa quidem et alia signa fecit Jesus in conspectu discipulorum suorum, quæ non sunt scripta in libro hoc.

³¹Hæc autem scripta sunt ut credatis, quia Jesus est Christus Filius Dei: et ut credentes, vitam habeatis in nomine ejus.

Avoid Strife and Pursue Harmony

¹[Melior est buccella sicca cum gaudio quam domus plena victimis cum jurgio.

²Servus sapiens dominabitur filiis stultis, et inter fratres hæreditatem dividet.

³Sicut igne probatur argentum et aurum camino, ita corda probat Dominus.

⁴Malus obedit linguæ iniquæ, et fallax obtemperat labiis mendacibus.

⁵Qui despicit pauperem exprobrat factori ejus, et qui ruina lætatur alterius non erit impunitus.

⁶Corona senum filii filiorum, et gloria filiorum patres eorum.

⁷Non decent stultum verba composita, nec principem labium mentiens.

⁸Gemma gratissima exspectatio præstolantis; quocumque se vertit, prudenter intelligit.

⁹Qui celat delictum quærit amicitias; qui altero sermone repetit, separat fœderatos.

¹⁰Plus proficit correptio apud prudentem, quam centum plagæ apud stultum.

¹¹Semper jurgia quærit malus: angelus autem crudelis mittetur contra eum.

¹²Expedit magis ursæ occurrere raptis fœtibus, quam fatuo confidenti in stultitia sua.

¹³Qui reddit mala pro bonis, non recedet malum de domo ejus.

¹⁴Qui dimittit aquam caput est jurgiorum, et antequam patiatur contumeliam judicium deserit.]

¹⁵[Qui justificat impium, et qui condemnat justum, abominabilis est uterque apud Deum.

¹⁶Quid prodest stulto habere divitias, cum sapientiam emere non possit? Qui altum facit domum suam quærit ruinam, et qui evitat discere incidet in mala.

¹⁷Omni tempore diligit qui amicus est, et frater in angustiis comprobatur.

¹⁸Stultus homo plaudet manibus, cum spoponderit pro amico suo.

¹⁹Qui meditatur discordias diligit rixas, et qui exaltat ostium quærit ruinam.

²⁰Qui perversi cordis est non inveniet bonum, et qui vertit linguam incidet in malum.

²¹Natus est stultus in ignominiam suam; sed nec pater in fatuo lætabitur.

²²Animus gaudens ætatem floridam facit; spiritus tristis exsiccat ossa.

²³Munera de sinu impius accipit, ut pervertat semitas judicii.

²⁴In facie prudentis lucet sapientia; oculi stultorum in finibus terræ.

²⁵Ira patris filius stultus, et dolor matris quæ genuit eum.

²⁶Non est bonum damnum inferre justo, nec percutere principem qui recta judicat.

²⁷Qui moderatur sermones suos doctus et prudens est, et pretiosi spiritus vir eruditus.

²⁸Stultus quoque, si tacuerit, sapiens reputabitur, et si compresserit labia sua, intelligens.]

Stand Firm in the Lord and Be of the Same Mind

¹Itaque fratres mei carissimi, et desideratissimi, gaudium meum, et corona mea: sic state in Domino, carissimi.

²Evodiam rogo, et Syntychen deprecor, idipsum sapere in Domino.

³Etiam rogo et te, germane compar, adjuva illas, quæ mecum laboraverunt in Evangelio cum Clemente, et ceteris adjutoribus meis, quorum nomina sunt in libro vitæ.

Rejoice Always, Turn Anxiety into Prayer

⁴Gaudete in Domino semper: iterum dico gaudete.

⁵Modestia vestra nota sit omnibus hominibus: Dominus prope est.

⁶Nihil solliciti sitis: sed in omni oratione, et obsecratione, cum gratiarum actione petitiones vestræ innotescant apud Deum.

⁷Et pax Dei, quæ exuperat omnem sensum, custodiat corda vestra, et intelligentias vestras in Christo Jesu.

Think on Whatever Is True and Honorable

⁸De cetero fratres, quæcumque sunt vera, quæcumque pudica, quæcumque justa, quæcumque sancta, quæcumque amabilia, quæcumque bonæ famæ, siqua virtus, siqua laus disciplinæ, hæc cogitate.

⁹Quæ et didicistis, et accepistis, et audistis, et vidistis in me, hæc agite: et Deus pacis erit vobiscum.

The Secret of Contentment and God Who Supplies Every Need

¹⁰Gavisus sum autem in Domino vehementer, quoniam tandem aliquando refloruistis pro me sentire, sicut et sentiebatis: occupati autem eratis.

¹¹Non quasi propter penuriam dico: ego enim didici, in quibus sum, sufficiens esse.

¹²Scio et humiliari, scio et abundare (ubique et in omnibus institutus sum): et satiari, et esurire, et abundare, et penuriam pati.

¹³Omnia possum in eo qui me confortat.

¹⁴Verumtamen bene fecistis, communicantes tribulationi meæ.

¹⁵Scitis autem et vos Philippenses, quod in principio Evangelii, quando profectus sum a Macedonia, nulla mihi ecclesia communicavit in ratione dati et accepti, nisi vos soli:

¹⁶quia et Thessalonicam semel et bis in usum mihi misistis.

¹⁷Non quia quæro datum, sed requiro fructum abundantem in ratione vestra.

¹⁸Habeo autem omnia, et abundo: repletus sum, acceptis ab Epaphrodito quæ misistis odorem suavitatis, hostiam acceptam, placentem Deo.

¹⁹Deus autem meus impleat omne desiderium vestrum secundum divitias suas in gloria in Christo Jesu.

²⁰Deo autem et Patri nostro gloria in sæcula sæculorum. Amen.

Final Greetings and the Blessing of Grace

²¹Salutate omnem sanctum in Christo Jesu.

²²Salutant vos, qui mecum sunt, fratres. Salutant vos omnes sancti, maxime autem qui de Cæsaris domo sunt.

²³Gratia Domini nostri Jesu Christi cum spiritu vestro. Amen.